Ռուսաստանի քննչական կոմիտեն հայտարարել է գործի բացահայտման մասին, որը վերաբերում է Մոսկվայում ավելի քան երկու տասնամյակ առաջ տեղի ունեցած 25 սեռական ոտնձգությունների շարքին, հաղորդել է «Московский комсомолец»-ը։
73-ամյա չարագործի զոհերի մեծ մասն անչափահասներ էին։ Ամենափոքր զոհը ընդամենը 12 տարեկան էր։ Գործակալության տվյալներով՝ մեղադրյալն իրեն մեղավոր է ճանաչել։
Սեռական ոտնձգության մեղադրանքներից բացի՝ նա մեղադրվում է 11 կողոպուտների շարք կատարելու մեջ, որոնց հետեւանքով 16 մարդ վիրավորվել է։ Ամբաստանյալը համաձայնել է ներկայացված մեղադրանքներին։ Քրեական գործի փաստաթղթերը ուղարկվել են դատարան՝ հետագա քննության համար։
Իրավասու մարմինների տեղեկացմամբ՝ չարագործի անօրինական գործողությունները վերաբերում են 2000-ականների սկզբին։ Կասկածյալի հետքի վրա դուրս գալ հաջողվել է նախորդ տարիների չբացահայտված հանցագործությունների հետաքննությունների վերսկսման միջոցով։ ՌԴ քննչական կոմիտեի Մոսկվայի վարչության քրեագետները վերլուծել են արխիվացված 1 500 գործեր եւ բացահայտել հանցագործությունների կատարման ինքնատիպ նշանները։
Վճռորոշ գործոն է դարձել ավելի քան երկու տասնամյակ առաջ ստացված կենսաբանական նմուշների վերլուծությունը, որը գենետիկական վերլուծության միջոցով օգնել է ապացուցել մեղադրյալի մեղքը։ Լրացուցիչ ապացույց են ծառայել զոհերի ցուցմունքները, որոնք ճանաչել են չարագործին։
