Իսրայելի արտաքին գործերի նախարար Գիդեոն Սաարը երեքշաբթի օրը առանձնացված տարածաշրջան կատարած այցի ժամանակ Պաղեստինը համեմատել է Սոմալիլենդի հետ՝ հայտարարելով, որ Պաղեստինը «վիրտուալ» պետություն է, մինչդեռ Սոմալիլենդը «վերականգնում է» իր անկախությունը: Այս մասին հաղորդում է AFP-ն:
Սաարի հայտարարությունները Հարգեյսա քաղաք կատարած այցի ժամանակ հնչել են այն բանից հետո, երբ անցյալ ամիս Իսրայելը դարձել է առաջին երկիրը, որը պաշտոնապես ճանաչել է ինքնահռչակ Սոմալիլենդի Հանրապետությունը:
«Սոմալիլենդը որոշել է վերականգնել իր անկախությունը: Ի տարբերություն Պաղեստինի, Պաղեստինը...», — ասել է նա՝ երկրորդ անգամ մատներով օդում չակերտներ ցույց տալով, — «Սոմալիլենդը վիրտուալ պետություն չէ, այն գործող պետություն է: Սոմալիլենդը լիարժեք գործող երկիր է՝ հիմնված միջազգային իրավունքի սկզբունքների վրա», — հայտարարել է Սաարը Սոմալիլենդի առաջնորդ Աբդիրահման Մոհամեդ Աբդուլլահիի հետ համատեղ մամուլի ասուլիսի ժամանակ:
Իսրայելի վարչապետ Բենիամին Նեթանյահուն անցյալ ամիս իր հայտարարության ժամանակ նշել է, որ Սոմալիլենդի ճանաչման հռչակագիրը համահունչ է «նախագահ Թրամփի նախաձեռնությամբ ստորագրված Աբրահամյան համաձայնագրերի ոգուն» և հավելել է, որ Թել Ավիվը ձգտելու է Սոմալիլենդի հետ համագործակցության գյուղատնտեսության, առողջապահության, տեխնոլոգիաների և տնտեսության ոլորտներում: Սոմալիլենդը վայելում է արդյունավետ ինքնավարություն, ինչպես նաև հարաբերական խաղաղություն և կայունություն սկսած 1991 թվականից, երբ Սոմալիում սկսվեց քաղաքացիական պատերազմը, սակայն անջատված տարածաշրջանը մինչ այս երբևէ ճանաչում չէր ստացել որևէ այլ երկրի կողմից: Տարիներ շարունակ Սոմալին միավորել է միջազգային դերակատարներին՝ թույլ չտալու համար որևէ երկրի կողմից Սոմալիլենդի ճանաչումը: Այնուամենայնիվ, Իսրայելի կողմից ճանաչումը, ինչպես նաև Սաարի այցը առաջացրել են մի շարք երկրների, այդ թվում՝ Սոմալիի դատապարտումը:
