ՀՀ գլխավոր դատախազ Աննա Վարդապետյանն այսօր մանրամասներ հայտնեց 2023 թվականի գոստոսի 18-ին համացանցում տարածված տեսանյութի վերաբերյալ, որտեղ կինը բռնության էր ենթարկում անչափահաս աղջկան:
Աննա Վարդապետյանն ԱԺ-ում այսօր հայտարարեց, որ գործն արդեն դատարանում է։
«Գործի շրջանակներում 11 դրվագ է բացահայտվել։ Գործի վերաբերյալ հատուկ տեղեկատվություն չենք զետեղել մեր կայքում, քանի որ այդ երեխաները մեծանալու են և ապրելու են մեր հասարակության մեջ։ Մենք ուզում ենք, որ այն մարդիկ, ովքեր արել են այդ արարքը, պատժվեն»,- նշեց դատախազը:
Դատախազի խոսքով` գործից անջատված մաս կա, որը վերաբերում է քրեակատարողական հիմնարկում գտնվող անձին։
«Մենք դեռ պետք է քննենք ու հասկանանք, թե ինչպես է «Նուբարաշեն» ՔԿՀ-ում գտնվող անձը 11 ամիս շարունակ շահագործել հեռախոս կոնկրետ IP հասցեով, ոնց է ունեցել հասանելիություն էլեկտրոնային հարթակներին»,-նշեց Աննա Վարդապետյանը։
